Breaking News
चेन्नई : क्रिकेटचा महाकुंभ म्हणजेच एकदिवशी विश्वचषक सध्या सुरू असून, बुधवारी (18 ऑक्टोबर) 16 वा सामना न्यूझीलंड आणि अफगाणिस्तान यांच्यात चेन्नईमध्ये झाला. अफगाणिस्तानचा कर्णधार हशमतुल्ला शाहिदीने नाणेफेक जिंकून गोलंदाजीचा निर्णय घेतला. प्रथम फलंदाजी करताना न्यूझीलंडने अफगाणिस्तानसमोर 289 धावांचे लक्ष्य ठेवले होते. याचा पाठला करताना अफगाणिस्तानच्या संघाला केवळ 139 धावा करता येऊ शकल्या. त्यामुळे न्यूझीलंडने विजयाचा सलग चौथा चौकार लगावला आहे.
न्यूझीलंडने अफगाणिस्तानचा 149 धावांनी पराभव केला आहे. या शानदार विजयासह किवी संघ आठ गुणांसह गुणतालिकेत अव्वल स्थानी पोहोचला आहे. या सामन्यात न्यूझीलंडने प्रथम फलंदाजी करताना सहा गडी गमावून 288 धावा केल्या. प्रत्युत्तरात अफगाणिस्तानचा संघ 34.4 षटकांत 139 धावांवर गारद झाला.
न्यूझीलंडकडून ग्लेन फिलिप्सने सर्वाधिक 71 धावा केल्या. तर टॉम लॅथमने 68 धावांची खेळी केली. सलामीवीर विल यंग 54 धावा करून बाद झाला. अफगाणिस्तानकडून नवीन उल हक आणि अजमतुल्ला उमरझाईने प्रत्येकी दोन बळी घेतले. रशीद खान आणि मुजीब उर रहमान यांना प्रत्येकी एक विकेट मिळाली. अफगाणिस्तानकडून रहमत शाहने सर्वाधिक 36 धावा केल्या. अजमतुल्लाने 27 धावांचे योगदान दिले. या दोघांशिवाय अफगाणिस्तानच्या एकाही फलंदाजाला 20 धावांचा पल्ला गाठता आला नाही.
भारत आणि बांगलादेश यांच्यातील एकदिवसीय विश्वचषक 2023 मधील 17 वा सामना 19 ऑक्टोबर रोजी पुण्यातील महाराष्ट्र क्रिकेट असोसिएशन स्टेडियमवर खेळवला जाईल. भारतीय संघाने आतापर्यंत तीन सामने खेळले असून, त्यात ऑस्ट्रेलिया, अफगाणिस्तान आणि पाकिस्तानचा पराभव केला आहे. आता भारतीय संघ बांगलादेशला हरवून गुणतालिकेत अव्वल स्थानी येण्याची शक्यता आहे. मात्र, पुण्यात गुरुवारी वातावरण कसे राहणार यावरही सामन्यांचे भवितव्य अवलंबून आहे.
रिपोर्टर
The Reporter specializes in covering a news beat, produces daily news for The Global Times
The Global Times